وزیراعلیٰ نے فوجی اہلکاروں کی میتوں پر گل چڑھائے

جموں//وزیراعلیٰ محبوبہ مفتی نے منگلوار صبح اُن فوجی اہلکاروں کی میتوں پر گُل چڑھائے جو سنجوان فوجی کیمپ پر ہوئے ملی ٹنٹ حملے کے دوران مارے گئے تھے۔نائب وزیر اعلیٰ ڈاکٹر نرمل سنگھ، ریاستی وزراءعبدالحق خان اور چودھری ذوالفقار علی ، ایم ایل اے جموں ویسٹ ست شرما کے علاوہ فوج اور پولیس کے کئی سینئر افسروں نے بھی فوجی اہلکاروں کی میتوں پر گل چڑھائے۔بعد میں وزیر اعلیٰ نے مارے گئے فوجی اہلکاروں کے افراد خانہ کے ساتھ بات چیت کی اور ان کی ڈھارس بندھائی۔وزیر اعلیٰ نے ان کے ساتھ تعزیت اور ہمدردی کا اظہار کرتے ہوئے ان فوجی اہلکاروں کی ارواح کے ابدی سکون کے لئے دعا کی۔