کشمیر کے پہاڑی علاقوں میں برف باری، میدانی علاقوں میں بارشیں، سیاحتی مقامات پر سفید چادر بچھ گئی

SHOPIAN, NOV 30 (UNI):- People walk during heavy Snowfall in Shopian district on Thursday .UNI PHOTO-47U

سری نگر//محکمہ موسمیات کی پیش گوئی کے عین مطابق وادی کشمیر کے پہاڑی علاقوں میں برف باری جبکہ میدانی علاقوں میں رک رک کر بارشوں کا سلسلہ جاری ہے۔متعلقہ محکمے کے ایک ترجمان کے مطابق وادی میں جمعرات کو بالائی علاقوں میں ہلکی سے درمیانی درجے کی برف باری جبکہ میدانی علاقوں میں درمیانی درجے کی بارشوں کا امکان ہے۔انہوں نے کہا کہ بعد ازاں وادی میں 10 دسمبر تک موسم ابر آلود مگر خشک رہنے کا امکان ہے۔ان کا کہنا تھا کہ وادی میں یکم اور 2 دسمبر کو موسم جزوی یا کلی طور پر ابر آلود رہ سکتا ہے جبکہ 3 دسمبر کو موسم کلی طور ابر آلود رہنے کی توقع ہے۔موصوف ترجمان نے کہا کہ بعد ازاں وادی میں 4 سے 10 دسمبر تک موسم کبھی جزوی تو کبھی کلی طور پر ابر آلود رہنے کا امکان ہے۔انہوں نے کہا کہ وادی میں یکم دسمبر تک شبانہ درجہ حرارت میں بہتری درج ہونے کا امکان ہے تاہم بعد ازاں اس میں ایک بار پھر گراوٹ درج ہوسکتی ہے۔ان کا کہنا تھا کہ برف باری کے نتیجے میں مغل روڈ، زوجیلا، سنتھن ٹاپ اور دیگر پہاڑی علاقوں میں ٹریفک کی نقل و حمل متاثرہوئی ہے۔شوپیاں سے نامہ نگار نے اطلاع دی ہے کہ وہاں اوپری پہاڑ ی علاقوں میں جمعرات کی صبح سے برف و باری ہو رہی ہے۔ انہوں نے بتایا کہ شوپیاں کے سدیواور ہر پورہ میں تازہ برف باری کی وجہ سے لوگوں کا مشکلات کاسامنا کرناپڑرہا ہے۔ وسطی کشمیر سے نمائندے نے اطلاع دی ہے کہ چرار شریف کے دور دراز میدانی علاقوں میں جمعرات کو برف و باری ہوئی۔ انہوں نے بتایا کہ چرار شریف کے کنہ دجن ، چونٹی نارڈ ، ژلین اور اس کے آس پاس علاقوں میں سفید چادر بچھ گئی ہے۔ ان کے مطابق بڈگام کے سیاحتی مقامات یوسمرگ اور دودھ پتھری میں تازہ برف باری کی وجہ سے وہاں پر موجود سیاحوں میں خوشی کی لہر دوڑ گئی ۔ شہر آفاق گلمرگ میں جمعرات کی صبح سے ہی رک رک کر برفباری ہو رہی ہے جس وجہ سے وسیع العریض علاقے میں سفید چادر بچھ گئی ۔ نامہ نگار نے بتایا کہ گلمرگ کے افروٹ میں پانچ انچ تازہ برف ریکارڈ کی گئی ہے۔ شمالی ضلع کپواڑہ کے بالائی علاقوں میں برف باری کی وجہ سے کئی علاقے کٹ کر رہ گئے ہیں۔ وادی کشمیر کے دیگر سیاحتی مقامات جن میںسونہ مرگ اور پہلگام شامل ہیں وہاں پر بھی تازہ برف باری ہوئی ہے۔ دریں اثنا مطلع ابر آلود رہنے کی وجہ سے وادی کے شبانہ درجہ حرارت میں مزید بہتری ریکارڈ ہوئی ہے۔گرمائی دارلحکومت سری نگر میں کم سے کم درجہ حرارت 5.3 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت0.8 ڈگری سینٹی گریڈ ریکارڈ ہوا تھا۔وادی کے شہرہ آفاق سیاحتی مقام گلمرگ میں کم سے کم درجہ حرارت منفی1.0 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی1.8 ڈگری سینٹی گریڈ ریکارڈ ہوا تھا۔سرحدی ضلع کپوارہ میں کم سے کم درجہ حرارت4.2 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت 1.3 ڈگری سینٹی گریڈ ریکارڈ ہوا تھا۔گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت 5.0 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت0.8 ڈگری سینٹی گریڈ ریکارڈ ہوا تھا۔لداخ یونین ٹریٹری کے ضلع لیہہ میں کم سے کم درجہ حرارت منفی5.8 ڈگری سینٹی گریڈ ریکارڈ ہوا ہے۔یو این آئی