نئے کالج اب الگ عمارتوں میں کام کاج جاری رکھیں گے : الطاف بخاری

جموں//وزیر تعلیم سید محمد الطاف بخاری نے آج کہا کہ حکومت ماضی کی طرح نئے کاکالجوں کو گورنمنٹ ہائیر سکینڈری سکولوں میں نہیں چلائے گی بلکہ ان اداروں کیلئے الگ کرائے والی عمارتوں کا انتظام کیا جائے گا ۔ وزیر آج بارہمولہ میں گورنمنٹ ڈگری کالج کیمپس رفیع آباد کی تعمیر کے سلسلے میں اراضی کی نشاندہی کے عمل کا جائیزہ لینے اور بارہمولہ ڈگری کالج کیمپس کو وسعت دینے کی ایک میٹنگ سے خطاب کر رہے تھے ۔ میٹنگ میں قانون ساز اسمبلی رفیع آباد کے ممبر یاور میر ، اعلیٰ تعلیم کے پرنسپل سیکرٹری ڈاکٹر اصغر سامون ، ڈائریکٹر کالجز پروفیسر مشتاق احمد چاٹ ، ڈپٹی کمشنر بارہمولہ ڈاکٹر ناصر احمد نقاش و دیگر افسران موجود تھے ۔ وزیر نے گورنمنٹ ڈگری کالج رفیع آباد کی تعمیر کے سلسلے میں اراضی کی نشاندہی اور بارہمولہ ڈگری کالج کو وسعت دینے پر غور و خوض کیا ۔ کالج کیلئے ایک سپورٹس سٹیڈیم کی ضرورت پر روشنی ڈالتے ہوئے وزیر نے کہا کہ حکومت اس سلسلے میں رقومات کا انتظام ریاستی سرکار اور مرکزی معاونت والی سپورٹس ڈیولپمنٹ سکیموں سے حاصل کرے گی ۔ وزیر نے ضلع انتظامیہ کو ہدایت دی کہ ان دو پروجیکٹوں میں حائل رکاوٹوں کو دور کر کے تعمیراتی کام شروع کرے ۔